๙. อุปาคตหาสนิยเถราปทาน (๒๖๙)

๒๗๑|๒๗๑.๓๔| หิมวนฺตสฺส เวมชฺเฌ สโร อาสิ สุนิมฺมิโต ตตฺถาหํ รกฺขโส อาสึ เหฏฺฐสีโส ภยานโก ฯ |๒๗๑.๓๕| อนุกมฺปโก การุณิโก วิปสฺสี โลกนายโก มมุทฺธริตุกาโม โส อาคญฺฉิ มม สนฺติเก ฯ |๒๗๑.๓๖| อุปาคตํ มหาวีรํ เทวเทวํ นราสภํ อาสยา อภินิกฺขมฺม อวนฺทึ สตฺถุโน อหํ ฯ |๒๗๑.๓๗| เอกนวุเต อิโต กปฺเป ยํ วนฺทึ ปุริสุตฺตมํ ทุคฺคตึ นาภิชานามิ วนฺทนาย อิทํ ผลํ ฯ |๒๗๑.๓๘| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา อุปาคตหาสนิโย เถโร อิมา คาถาโย อภาสิตฺถาติ ฯ อุปาคตหาสนิยตฺเถรสฺส อปทานํ สมตฺตํ ฯ