๘. ติณมุฏฐิทายกเถราปทาน (๓๔๘)

๓๕๐|๓๕๐.๔๘| หิมวนฺตสฺสวิทูเร ลมฺพโก นาม ปพฺพโต อุปติสฺโส นาม สมฺพุทฺโธ อพฺโภกาสมฺหิ จงฺกมิ ฯ |๓๕๐.๔๙| มิคลุทฺโธ ปุเร อาสึ อรญฺเญ กานเน อหํ ทิสฺวาน ตํ เทวเทวํ สยมฺภุํ อปราชิตํ ฯ |๓๕๐.๕๐| วิปฺปสนฺเนน จิตฺเตน ตทา ตสฺส มเหสิโน นิสีทนตฺถํ พุทฺธสฺส ติณมุฏฺฐิมทาสหํ ฯ |๓๕๐.๕๑| ทตฺวาน เทวเทวสฺส ภิยฺโย จิตฺตํ ปสาทยึ สมฺพุทฺธํ อภิวาเทตฺวา ปกฺกามิ อุตฺตรามุโข ฯ |๓๕๐.๕๒| อจิรํ คตมตฺตํ มํ มิคราชา อเหฐยิ สีเหน ปาติโต สนฺโต ตตฺถ กาลํ กโต อหํ ฯ |๓๕๐.๕๓| อาสนฺเน เม กตํ กมฺมํ พุทฺธเสฏฺเฐ อนาสเว สุมุตฺโต สรเวโคว เทวโลกํ อคจฺฉหํ ฯ |๓๕๐.๕๔| ยูโป ตตฺถ สุโภ อาสิ ปุญฺญกมฺมาภินิมฺมิโต สหสฺสกณฺโฑ สตฺตเคณฺฑุ ธชาลุ หริตามโย ฯ |๓๕๐.๕๕| ปภา นิทฺธาวเต ตสฺส สตรํสีว อุคฺคโต อากิณฺโณ เทวกญฺญาหิ อาโมทึ กามกามิหํ ฯ |๓๕๐.๕๖| เทวโลกา จวิตฺวาน สุกฺกมูเลน โจทิโต อาคนฺตฺวาน มนุสฺสตฺตํ ปตฺโตมฺหิ อาสวกฺขยํ ฯ |๓๕๐.๕๗| จตุนวุเต อิโต กปฺเป นิสีทนมทาสหํ ทุคฺคตึ นาภิชานามิ ติณมุฏฺฐิยิทํ ผลํ ฯ |๓๕๐.๕๘| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ติณมุฏฺฐิทายโก เถโร อิมา คาถาโย อภาสิตฺถาติ ฯ ติณมุฏฺฐิทายกตฺเถรสฺส อปทานํ สมตฺตํ ฯ