๕. โอปวุยหเถราปทาน (๕๕)

๕๗|๕๗.๓๓| ปทุมุตฺตรพุทฺธสฺส อาชานียํ อทาสหํ นิยฺยาเทตฺวาน สมฺพุทฺเธ อคมาสึ สกํ ฆรํ ฯ |๕๗.๓๔| เทวิโล นาม นาเมน สตฺถุโน อคฺคสาวโก วรธมฺมสฺส ทายาโท อาคญฺฉิ มม สนฺติกํ ฯ |๕๗.๓๕| สพฺพตฺถหาโร ภควา อาชาเนยฺโย น กมฺปติ ตว สงฺกปฺปมญฺญาย อธิวาเสสิ จกฺขุมา ฯ |๕๗.๓๖| อคฺฆาเปตฺวา วาตชวํ สินฺธวํ สีฆวาหนํ ปทุมุตฺตรพุทฺธสฺส ขมนียํ อทาสหํ ฯ |๕๗.๓๗| ยํ ยํ โยนูปปชฺชามิ เทวตฺตํ อถ มานุสํ อาชานียา วาตชวา วิตฺติ นิพฺพตฺตเร มม ฯ |๕๗.๓๘| ลาภา เตสํ สุลทฺธํ วา เย ลภนฺตุปสมฺปทํ ปุนปฺปยิรุปาเสยฺยํ พุทฺโธ โลเก สเจ ภเว ฯ |๕๗.๓๙| อฏฺฐวีสติกฺขตฺตาหํ ราชา อาสึ มหพฺพโล จาตุรนฺโต วิชิตาวี ชมฺพูทีปสฺส อิสฺสโร ฯ |๕๗.๔๐| อิมํ ปจฺฉิมกํ มยฺหํ จริโม วตฺตเต ภโว ปตฺโตมฺหิ อจลํ ฐานํ หิตฺวา ชยปราชยํ ฯ |๕๗.๔๑| จตุตฺตึเส สหสฺสมฺหิ มหาเตโชสิ ขตฺติโย สตฺตรตนสมฺปนฺโน จกฺกวตฺติ มหพฺพโล ฯ |๕๗.๔๒| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา โอปวุโยฺห เถโร อิมา คาถาโย อภาสิตฺถาติ ฯ โอปวุยฺหตฺเถรสฺส อปทานํ สมตฺตํ ฯ