๖. จิตกปูชกเถราปทาน (๑๑๖)

๑๑๘|๑๑๘.๔๙| วสามิ ราชายตเน สามจฺโจ สปริชฺชโน ปรินิพฺพุเต ภควติ สิขิโน โลกพนฺธุโน ฯ |๑๑๘.๕๐| ปสนฺนจิตฺโต สุมโน จิตกํ อคมาสหํ ตุริยํ ตตฺถ วาเทตฺวา คนฺธมาลํ สโมกิรึ ฯ |๑๑๘.๕๑| จิตกมฺหิ ปูชํ กตฺวาน วนฺทิตฺวา จิตกํ อหํ ปสนฺนจิตฺโต สุมโน สกํ ภวนุปาคมึ ฯ |๑๑๘.๕๒| ภวเน อุปวิฏฺโฐหํ จิตกปูชํ อนุสฺสรึ เตน กมฺเมน ทิปทินฺท โลกเชฏฺฐ นราสภ ฯ |๑๑๘.๕๓| อนุภุตฺวาน สมฺปตฺตึ เทเวสุ มานุเสสุ จ ปตฺโตมฺหิ อจลํ ฐานํ หิตฺวา ชยปราชยํ ฯ |๑๑๘.๕๔| เอกตฺตึเส อิโต กปฺเป ยํ ปุปฺผมภิโรปยึ ทุคฺคตึ นาภิชานามิ จิตกปูชายิทํ ผลํ ฯ |๑๑๘.๕๕| เอกูนตึเส กปฺปมฺหิ อิโต โสฬส ราชิโน อุคฺคตา นาม นาเมน จกฺกวตฺตี มหพฺพลา ฯ |๑๑๘.๕๖| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา จิตกปูชโก เถโร อิมา คาถาโย อภาสิตฺถาติ ฯ จิตกปูชกตฺเถรสฺส อปทานํ สมตฺตํ ฯ