๘. อักกันตสัญญกเถราปทาน (๒๑๘)

๒๒๐|๒๒๐.๓๗| กุสาฏกํ คเหตฺวาน อุปชฺฌายสฺส ปารุเป มนฺตญฺจ อนุสิกฺขามิ คณฺฑเภทสฺส ปตฺติยา ฯ |๒๒๐.๓๘| อทฺทสํ วิรชํ พุทฺธํ อาหุตีนํ ปฏิคฺคหํ อุสภํ ปวรํ อคฺคํ ติสฺสํ พุทฺธํ คชุตฺตมํ ฯ |๒๒๐.๓๙| กุสาฏกํ ปตฺถริตํ อกฺกมนฺตํ นรุตฺตมํ สมุคฺคตํ มหาวีรํ โลกเชฏฺฐํ นราสภํ ฯ |๒๒๐.๔๐| ทิสฺวา ตํ โลกปชฺโชตํ วิมลํ จนฺทสนฺนิภํ อวนฺทึ สตฺถุโน ปาเท วิปฺปสนฺเนน เจตสา ฯ |๒๒๐.๔๑| จตุนวุเต อิโต กปฺเป ยํ อทาสึ กุสาฏกํ ทุคฺคตึ นาภิชานามิ กุสาฏกสฺสิทํ ผลํ ฯ |๒๒๐.๔๒| สตฺตตึเส อิโต กปฺเป เอโก อาสึ ชนาธิโป สุนนฺโท นาม นาเมน จกฺกวตฺติ มหพฺพโล ฯ |๒๒๐.๔๓| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา อกฺกนฺตสญฺญโก เถโร อิมา คาถาโย อภาสิตฺถาติ ฯ อกฺกนฺตสญฺญกตฺเถรสฺส อปทานํ สมตฺตํ ฯ