๑. อากาสุกขิปิยเถราปทาน (๒๖๑)

๒๖๓|๒๖๓.๑| สุวณฺณวณฺณํ สิทฺธตฺถํ คจฺฉนฺตํ อนฺตราปเณ ชลชคฺเค ทุเว คยฺห อุปคญฺฉึ นราสภํ ฯ |๒๖๓.๒| เอกญฺจ ปุปฺผํ ปาเทสุ พุทฺธเสฏฺฐสฺส นิกฺขิปึ เอกญฺจ ปุปฺผํ ปคฺคยฺห อากาเส อุกฺขิปึ อหํ ฯ |๒๖๓.๓| จตุนวุเต อิโต กปฺเป ยํ ปุปฺผมภิปูชยึ ทุคฺคตึ นาภิชานามิ ปุปฺผทานสฺสิทํ ผลํ ฯ |๒๖๓.๔| อิโต พตฺตึสกปฺปมฺหิ เอโก อาสึ มหิปฺปติ อนฺตลิกฺขกโร นาม จกฺกวตฺติ มหพฺพโล ฯ |๒๖๓.๕| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา อากาสุกฺขิปิโย เถโร อิมา คาถาโย อภาสิตฺถาติ ฯ อากาสุกฺขิปิยตฺเถรสฺส อปทานํ สมตฺตํ ฯ