๖. ธูปทายกเถราปทาน (๒๖)

๒๘|๒๘.๑๖๓| สิทฺธตฺถสฺส ภควโต โลกเชฏฺฐสฺส ตาทิโน กุฏิธูปํ มยา ทินฺนํ วิปฺปสนฺเนน เจตสา ฯ |๒๘.๑๖๔| ยํ ยํ โยนูปปชฺชามิ เทวตฺตํ อถ มานุสํ สพฺเพสํปิ ปิโย โหมิ ธูปทานสฺสิทํ ผลํ ฯ |๒๘.๑๖๕| จตุนวุเต อิโต กปฺเป ยํ ธูปมททึ ตทา ทุคฺคตึ นาภิชานามิ ธูปทานสฺสิทํ ผลํ ฯ |๒๘.๑๖๖| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ธูปทายโก เถโร อิมา คาถาโย อภาสิตฺถาติ ฯ ธูปทายกตฺเถรสฺส อปทานํ สมตฺตํ ฯ