This collection answers by quoting only — editions are set side by side, never summarised, interpreted, or scored for reliability
พระไตรปิฎกภาษาไทย ฉบับหลวง · Public domain (term expired) — operator determination
เอกูนตึโส ปณฺณทายกวคฺโค ปฐมํ ปณฺณทายกตฺเถราปทานํ (๒๘๑)
๒๘๓|๒๘๓.๑| ปณฺณสาเล นิสินฺโนมฺหิ ปณฺณโภชนโภชโน อุปวิฏฺฐญฺจ มํ สนฺตํ อุปคญฺฉิ มหาอิสิ ฯ |๒๘๓.๒| สิทฺธตฺโถ โลกปชฺโชโต สพฺพโลกติกิจฺฉโก ตสฺส ปณฺณํ มยา ทินฺนํ นิสินฺนสฺส ปณฺณสนฺถเร ฯ |๒๘๓.๓| จตุนวุเต อิโต กปฺเป ยํ ปณฺณมททึ ตทา ทุคฺคตึ นาภิชานามิ ปณฺณทานสฺสิทํ ผลํ ฯ |๒๘๓.๔| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ปณฺณทายโก เถโร อิมา คาถาโย อภาสิตฺถาติ ฯ ปณฺณทายกตฺเถรสฺส อปทานํ สมตฺตํ ฯ