๖. อาสนถวิกเถราปทาน (๓๑๖)

๓๑๘|๓๑๘.๒๖| เจติยํ อุตฺตมํ นาม สิขิโน โลกพนฺธุโน อรญฺเญ อิริเณ วิวเน อนฺวาหิณฺฑามหํ ตทา ฯ |๓๑๘.๒๗| ปวนา นิกฺขมนฺเตน ทิฏฺฐํ สีหาสนํ มยา เอกํสํ อญฺชลึ กตฺวา สนฺถวึ โลกนายกํ ฯ |๓๑๘.๒๘| ทิวสภาคํ ถวิตฺวาน พุทฺธํ โลกคฺคนายกํ หฏฺโฐ หฏฺเฐน จิตฺเตน อิมํ วาจมุทีรยึ ฯ |๓๑๘.๒๙| นโม เต ปุริสาชญฺญ นโม เต ปุริสุตฺตม สพฺพญฺญูสิ มหาวีร โลกเชฏฺฐ นราสภ ฯ |๓๑๘.๓๐| อภิตฺถวิตฺวา สิขินํ นิมิตฺตกรเณนหํ อาสนํ อภิวาเทตฺวา ปกฺกามึ อุตฺตรามุโข ฯ |๓๑๘.๓๑| เอกตฺตึเส อิโต กปฺเป ยํ ถวึ วทตํ วรํ ทุคฺคตึ นาภิชานามิ โถมนาย อิทํ ผลํ ฯ |๓๑๘.๓๒| สตฺตวีเส อิโต กปฺเป อตุลฺยา สตฺต อาสุ เต สตฺตรตนสมฺปนฺนา จกฺกวตฺตี มหพฺพลา ฯ |๓๑๘.๓๓| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา อาสนตฺถวิโก เถโร อิมา คาถาโย อภาสิตฺถาติ ฯ อาสนตฺถวิกตฺเถรสฺส อปทานํ สมตฺตํ ฯ