๑๐. เอกัญชลิยเถราปทาน (๓๕๐)

๓๕๒|๓๕๒.๖๓| เรวโต นาม สมฺพุทฺโธ นทีกูเล วสี ตทา อทฺทสํ วิรชํ พุทฺธํ ปีตรํสีว ภาณุมํ ฯ |๓๕๒.๖๔| อุกฺกามุขํ ปหฏฺฐํว ขทิรงฺคารสนฺนิภํ โอสธี วิย โรจนฺตํ เอกญฺชลิมกาสหํ ฯ |๓๕๒.๖๕| จตุนวุเต อิโต กปฺเป ยํ อญฺชลิมกาสหํ ทุคฺคตึ นาภิชานามิ อญฺชลิยา อิทํ ผลํ ฯ |๓๕๒.๖๖| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา เอกญฺชลิโย เถโร อิมา คาถาโย อภาสิตฺถาติ ฯ เอกญฺชลิยตฺเถรสฺส อปทานํ สมตฺตํ ฯ อุทฺทานํ ปทุมี อุปฺปลมาลี ธโช กิงฺกณิกํ นฬํ จมฺปโก ปทุมมุฏฺฐิ ตินฺทุเกกญฺชลี ตถา ฉ จ สฏฺฐิ จ คาถาโย คณิตาโย วิภาวิหิ ฯ เอกปทุมวคฺโค ปญฺจตฺตึโส ฯ --------