๖. พักกุลเถราปทาน (๓๙๖)

๓๙๘|๓๙๘.๓๙๐| หิมวนฺตสฺสวิทูเร โสภิโต นาม ปพฺพโต อสฺสโม สุกโต มยฺหํ สกสิสฺเสหิ มาปิโต ฯ |๓๙๘.๓๙๑| มณฺฑปา จ พหู ตตฺถ ปุปฺผิตา สินฺทุวาริตา กปิฏฺฐา จ พหู ตตฺถ จมฺปกา นาคเกตกา ฯ |๓๙๘.๓๙๒| นิคุณฺฑิโย พหู ตตฺถ พทรามลกาปิ จ ผารุสกา อลาพู จ ปุณฺฑรีกา จ ปุปฺผิตา ฯ |๓๙๘.๓๙๓| อฬกฺกา เพลุวา ตตฺถ กทลี มาตุลุงฺคกา มหานามา พหู ตตฺถ อชฺชุนา จ ปิยงฺคุกา ฯ |๓๙๘.๓๙๔| โกสุมฺภา สลฬา นีปา นิโคฺรธา จ กปิฏฺฐนา เอทิโส อสฺสโม มยฺหํ สสิสฺโสหํ ตหึ วสึ ฯ |๓๙๘.๓๙๕| อโนมทสฺสี ภควา สยมฺภู โลกนายโก คเวสํ ปฏิสลฺลานํ มมสฺสมํ อุปาคมิ ฯ |๓๙๘.๓๙๖| อุเปตญฺจ มหาวีรํ อโนมทสฺสึ มหายสํ ขเณน โลกนาถสฺส วาตาพาโธ สมุฏฺฐหิ ฯ |๓๙๘.๓๙๗| วิจรนฺโต อรญฺญมฺหิ อทฺทสํ โลกนายกํ อุปคนฺตฺวาน สมฺพุทฺธํ จกฺขุมนฺตํ มหายสํ ฯ |๓๙๘.๓๙๘| อิริยาปถญฺจ ทิสฺวาน อุปลกฺเขสหํ ตทา นิสฺสํสยํ หิ พุทฺธสฺส พฺยาธิโน อุปปชฺชถ ฯ |๓๙๘.๓๙๙| ขิปฺปํ อสฺสมมาคญฺฉึ มม สิสฺสาน สนฺติเก เภสชฺชํ กตฺตุกาโมหํ สิสฺสํ อามนฺตยึ ตทา ฯ |๓๙๘.๔๐๐| ปฏิสุณิตฺวาน เม วากฺยํ สิสฺสา สพฺเพ สคารวา เอกชฺฌํ สนฺนิปตึสุ สตฺถุ คารวตา มม ฯ |๓๙๘.๔๐๑| ขิปฺปํ ปพฺพตมารุยฺห สพฺโพสถมกาสหํ ปานียโยคํ กตฺวาน พุทฺธเสฏฺฐสฺสทาสหํ ฯ |๓๙๘.๔๐๒| ปริภุตฺเต มหาวีเร สพฺพญฺญุโลกนายเก ขิปฺปํ วาโต วูปสมิ สุคตสฺส มเหสิโน ฯ |๓๙๘.๔๐๓| ปสฺสทฺธํ ทรถํ ทิสฺวา อโนมทสฺสี มหายโส สกาสเน นิสีทิตฺวา อิมา คาถา อภาสถ ฯ |๓๙๘.๔๐๔| โย เม อทาสิ เภสชฺชํ พฺยาธิญฺจ สมยี มม ตมหํ กิตฺตยิสฺสามิ สุณาถ มม ภาสโต ฯ |๓๙๘.๔๐๕| กปฺปสตสหสฺสานิ เทวโลเก รมิสฺสติ วาทิเต ตูริเย ตตฺถ โมทิสฺสติ สทา อยํ ฯ |๓๙๘.๔๐๖| มนุสฺสโลกมาคนฺตฺวา สุกฺกมูเลน โจทิโต สหสฺสกฺขตฺตุํ ราชาปิ จกฺกวตฺติ ภวิสฺสติ ฯ |๓๙๘.๔๐๗| ปญฺจปญฺญาสกปฺปมฺหิ อโนมิ นาม ขตฺติโย จาตุรนฺโต วิชิตาวี ชมฺพูทีปสฺส อิสฺสโร ฯ |๓๙๘.๔๐๘| สตฺตรตนสมฺปนฺโน จกฺกวตฺติ มหพฺพโล ตาวตึเสหิ โขเภตฺวา อิสฺสรํ การยิสฺสติ ฯ |๓๙๘.๔๐๙| เทวภูโต มนุสฺโส วา อปฺปาพาโธ ภวิสฺสติ ปริทาหํ วิวชฺเชตฺวา พฺยาธึ โลเก ตริสฺสติ ฯ |๓๙๘.๔๑๐| อปริเมยฺเย อิโต กปฺเป โอกฺกากกุลสมฺภโว โคตโม นาม นาเมน สตฺถา โลเก ภวิสฺสติ ฯ |๓๙๘.๔๑๑| ตสฺส ธมฺเมสุ ทายาโท โอรโส ธมฺมนิมฺมิโต สพฺพาสเว ปริญฺญาย นิพฺพายิสฺสตินาสโว ฯ |๓๙๘.๔๑๒| กิเลเส ฌาปยิตฺวาน ตณฺหาโสตํ ตริสฺสติ พกฺกุโล นาม นาเมน เหสฺสติ สตฺถุสาวโก ฯ |๓๙๘.๔๑๓| อิทํ สพฺพํ อภิญฺญาย โคตโม สกฺยปุงฺคโว ภิกฺขุสงฺเฆ นิสีทิตฺวา เอตทคฺเค ฐเปสฺสติ ฯ |๓๙๘.๔๑๔| อโนมทสฺสี ภควา สยมฺภู โลกนายโก วิเวกมนุโลเกนฺโต มมสฺสมํ อุปาคมิ ฯ |๓๙๘.๔๑๕| อุปาคตํ มหาวีรํ สพฺพญฺญุํ โลกนายกํ สพฺโพสเถน ตปฺเปสึ ปสนฺโน เสหิ ปาณิภิ ฯ |๓๙๘.๔๑๖| ตสฺส เม สุกตํ กมฺมํ สุเขตฺเต พีชสมฺปทา เขเปตุํ เนว สกฺโกมิ ตทา หิ สุกตํ มม ฯ |๓๙๘.๔๑๗| ลาภา มม สุลทฺธํ เม โยหํ อทฺทกฺขิ นายกํ เตน กมฺมาวเสเสน ปตฺโตมฺหิ อจลํ ปทํ ฯ |๓๙๘.๔๑๘| สพฺพเมตํ อภิญฺญาย โคตโม สกฺยปุงฺคโว ภิกฺขุสงฺเฆ นิสีทิตฺวา เอตทคฺเค ฐเปสิ มํ ฯ |๓๙๘.๔๑๙| อปริเมยฺเย อิโต กปฺเป ยํ กมฺมมกรึ ตทา ทุคฺคตึ นาภิชานามิ เภสชฺชสฺส อิทํ ผลํ ฯ |๓๙๘.๔๒๐| กิเลสา ฌาปิตา มยฺหํ ภวา สพฺเพ สมูหตา สพฺพาสวปริกฺขีโณ นตฺถิทานิ ปุนพฺภโว ฯ |๓๙๘.๔๒๑| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๓๙๘.๔๒๒| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา พกฺกุโล เถโร อิมา คาถาโย อภาสิตฺถาติ ฯ พกฺกุลตฺเถรสฺส อปทานํ สมตฺตํ ฯ