๑. ติสสเมตเตยยเถราปทาน (๔๐๑)

๔๐๓|๔๐๓.๑| ปพฺภารกูฏํ นิสฺสาย โสภิโต นาม ตาปโส ปวตฺตผลํ ภุญฺชิตฺวา วสติ ปพฺพตนฺตเร ฯ |๔๐๓.๒| อคฺคิทารุํ อาหริตฺวา อุชฺชเลสึ อหํ ตทา อุตฺตมตฺถํ คเวสนฺโต พฺรหฺมโลกูปปตฺติยา ฯ |๔๐๓.๓| ปทุมุตฺตโร โลกวิทู อาหุตีนํ ปฏิคฺคโห มมุทฺธริตุกาโม โส อาคญฺฉิ มม สนฺติเก ฯ |๔๐๓.๔| กึ กโรสิ มหาปุญฺญ เทหิ เม อคฺคิทารุกํ อหํ อคฺคึ ปริจเร ตโต เม สุทฺธิ โหหิติ ฯ |๔๐๓.๕| สุภทฺทโก ตฺวํ มนุช เทวเต ตฺวํ ปชานสิ ตุวํ อคฺคึ ปริจร หนฺท เต อคฺคิทารุกํ ฯ |๔๐๓.๖| ตโต กฏฺฐํ คเหตฺวาน อคฺคึ อุชฺชาลยี ชิโน น ตตฺถ กฏฺฐํ ปชฺฌายิ ปาฏิเหรํ มเหสิโน ฯ |๔๐๓.๗| น เต อคฺคิ ปชฺชลติ อาหุติ เต น วิชฺชติ นิรตฺถกํ จ ตํ ตุยฺหํ อคฺคึ ปริจรสฺสุ เม ฯ |๔๐๓.๘| กีทิโส เต มหาวีร อคฺคิ ตว ปวุจฺจติ มยฺหํปิ กถยสฺเสตํ อุโภ ปริจรามเส ฯ |๔๐๓.๙| เหตุธมฺมนิโรธาย กิเลสฌาปนาย จ อิสฺสามจฺฉริยํ หิตฺวา ตโย เอเต มมาหุตี ฯ |๔๐๓.๑๐| กีทิโส ตฺวํ มหาวีร กถํโคตฺโตสิ มาริส อาจารปฏิปตฺติ เต พาฬฺหํ โข มม รุจฺจติ ฯ |๔๐๓.๑๑| ขตฺติยมฺหิ กุเล ชาโต อภิญฺญาปารมึ คโต สพฺพาสวปริกฺขีโณ นตฺถิ ทานิ ปุนพฺภโว ฯ |๔๐๓.๑๒| ยทิ พุทฺโธสิ สพฺพญฺญู ปภงฺกร ตโมนุท นมสฺสิสฺสามิ ตํ เทว ทุกฺขสฺสนฺตํ กโร ตุวํ ฯ |๔๐๓.๑๓| ปตฺถริตฺวา ชินจมฺมํ นิสีทนมทาสหํ นิสีท ตตฺถ สพฺพญฺญู อุปฏฺฐิสฺสามหํ ตุวํ ฯ |๔๐๓.๑๔| นิสีทิ ภควา ตตฺถ อชินมฺหิ สุวิตฺถเต นิมนฺตยิตฺวา สมฺพุทฺธํ ปพฺพตํ อคมาสหํ ฯ |๔๐๓.๑๕| ขาริภารญฺจ ปูเรตฺวา ตินฺทุกผลมาหรึ มธุนา โยชยิตฺวาน ผลํ พุทฺธสฺสทาสหํ ฯ |๔๐๓.๑๖| มม นิชฺฌายมานสฺส ปริภุญฺชิ ตทา ชิโน ตตฺถ จิตฺตํ ปสาเทสิ เปกฺขนฺโต โลกนายกํ ฯ |๔๐๓.๑๗| ปทุมุตฺตโร โลกวิทู อาหุตีนํ ปฏิคฺคโห มมสฺสเม นิสีทิตฺวา อิมา คาถา อภาสถ ฯ |๔๐๓.๑๘| โย เม ผเลน ตปฺเปสิ ปสนฺโน เสหิ ปาณิภิ ตมหํ กิตฺตยิสฺสามิ สุณาถ มม ภาสโต ฯ |๔๐๓.๑๙| ปญฺจวีสติกฺขตฺตุํ โส เทวรชฺชํ กริสฺสติ สหสฺสกฺขตฺตุํ ราชา จ จกฺกวตฺติ ภวิสฺสติ ฯ |๔๐๓.๒๐| ตสฺส สงฺกปฺปมญฺญาย ปุพฺพกมฺมสมงฺคิโน อนฺนปานญฺจ วตฺถญฺจ สยนญฺจ มหารหํ ฯ |๔๐๓.๒๑| ปุญฺญกมฺเมน สํยุตฺตา นิพฺพตฺติสฺสนฺติ ตาวเท สทา สมฺมุทิโต จายํ ภวิสฺสติ อนามโย ฯ |๔๐๓.๒๒| อุปปชฺชติ ยํ โยนึ เทวตฺตํ อถ มานุสํ สพฺพตฺถ สุขิโต หุตฺวา มนุสฺสตฺตํ ภวิสฺสติ ฯ |๔๐๓.๒๓| อชฺฌายโก มนฺตธโร ติณฺณํ เวทาน ปารคู สมฺพุทฺธํ อุปคนฺตฺวาน อรหา โส ภวิสฺสติ ฯ |๔๐๓.๒๔| ยโต สรามิ อตฺตานํ ยโต ปตฺโตสฺมิ วิญฺญุตํ โภเค เม อูนตา นตฺถิ ผลทานสฺสิทํ ผลํ ฯ |๔๐๓.๒๕| วรธมฺมมนุปฺปตฺโต ราคโทเส สมูหนึ สพฺพาสวปริกฺขีโณ นตฺถิ ทานิ ปุนพฺภโว ฯ |๔๐๓.๒๖| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๔๐๓.๒๗| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๔๐๓.๒๘| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ติสฺสเมตฺเตยฺโย เถโร อิมา คาถาโย อภาสิตฺถาติ ฯ ติสฺสเมตฺเตยฺยตฺเถรสฺส อปทานํ สมตฺตํ ฯ