๙. อัมพปาลีเถริยาปทาน

๑๗๙|๑๗๙.๒๐๔| โย รํสิรุจิตาเวโฬ ผุสฺโส นาม มหามุนิ ตสฺสาหํ ภคินี อาสึ อชายึ ขตฺติเย กุเล ฯ |๑๗๙.๒๐๕| ตสฺส ธมฺมํ สุณิตฺวาหํ วิปฺปสนฺเนน เจตสา มหาทานํ ททิตฺวาน ปตฺถยึ รูปสมฺปทํ ฯ |๑๗๙.๒๐๖| เอกตฺตึเส อิโต กปฺเป สิขี โลกคฺคนายโก อุปฺปนฺโน โลกปชฺโชโต ติโลกสรโณ ชิโน ฯ |๑๗๙.๒๐๗| ตทา อรุณปุเร รมฺเม พฺรหฺมญฺญกุลสมฺภวา วิมุตฺตจิตฺตํ กุปิตา ภิกฺขุนึ อภิสาปยึ ฯ |๑๗๙.๒๐๘| เวสิกา จ อนาจารา ชินสาสนทูสิกา เอวํ อกฺโกสยิตฺวาน เตน ปาเปน กมฺมุนา ฯ |๑๗๙.๒๐๙| ทารุณํ นิรยํ คนฺตฺวา มหาทุกฺขสมปฺปิตา ตโต จุตา มนุสฺเสสุ อุปปนฺนา ตปสฺสินี ฯ |๑๗๙.๒๑๐| ทสชาติสหสฺสานิ คณิกตฺตํ อการยึ ตโต ปาปา น มุจฺจิสฺสํ ภุตฺวา ทุฏฺฐวิสํ ยถา ฯ |๑๗๙.๒๑๑| พฺรหฺมเวสมเสวิสฺสํ กสฺสเป ชินสาสเน เตน กมฺมวิปาเกน อชายึ ติทเส ปุเร ฯ |๑๗๙.๒๑๒| ปจฺฉิเม ภวสมฺปตฺเต อโหสึ โอปปาติกา อมฺพสาขนฺตเร ชาตา อมฺพปาลีติ เตนหํ ฯ |๑๗๙.๒๑๓| ปริวุตา ปาณโกฏีหิ ปพฺพชึ ชินสาสเน ปตฺตาหํ อจลํ ฐานํ ธีตา พุทฺธสฺส โอรสา ฯ |๑๗๙.๒๑๔| อิทฺธีสุ จ วสี โหมิ ทิพฺพาย โสตธาตุยา เจโตปริยญาณสฺส วสี โหมิ มหามุเน ฯ |๑๗๙.๒๑๕| ปุพฺเพนิวาสํ ชานามิ ทิพฺพจกฺขุํ วิโสธิตํ สพฺพาสวปริกฺขีณา นตฺถิ ทานิ ปุนพฺภโว ฯ |๑๗๙.๒๑๖| อตฺถธมฺมนิรุตฺตีสุ ปฏิภาเณ ตเถว จ ญาณํ เม วิมลํ สุทฺธํ พุทฺธเสฏฺฐสฺส วาหสา ฯ |๑๗๙.๒๑๗| กิเลสา ฌาปิตา มยฺหํ ภวา สพฺเพ สมูหตา นาคีว พนฺธนํ เฉตฺวา วิหรามิ อนาสวา ฯ |๑๗๙.๒๑๘| สฺวาคตํ วต เม อาสิ พุทฺธเสฏฺฐสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๑๗๙.๒๑๙| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อมฺพปาลี ภิกฺขุนี อิมา คาถาโย อภาสิตฺถาติ ฯ อมฺพปาลีเถริยา อปทานํ สมตฺตํ ฯ