๕. คังคมาลชาดก

๑๑๕๕องฺคารชาตา ปฐวี กุกฺกุลานุคตา มหี อถ คายสิ วตฺตานิ น ตํ ตปติ อาตโป ฯ อุทฺธํ ตปติ อาทิจฺโจ อโธ ตปติ วาลุกา อถ คายสิ วตฺตานิ น ตํ ตปติ อาตโป ฯ

๑๑๕๖น มํ ตปติ อาตโป อาตปฺปา ตปยนฺติ มํ อตฺถา หิ วิวิธา ราช เต ตปนฺติ น อาตโป ฯ

๑๑๕๗อทฺทสํ กาม เต มูลํ สงฺกปฺปา กาม ชายสิ น ตํ สงฺกปฺปยิสฺสามิ เอวํ กาม น เหหิสิ ฯ

๑๑๕๘อปฺปาปิ กามา น อลํ พหูหิปิ น ตปฺปติ อโห พาลานลปนา ปฏิวชฺเชถ ชคฺคโต ฯ

๑๑๕๙อปฺปสฺส กมฺมสฺส ผลํ มเมทํ อุทโย อชฺฌคมา มหตฺตปตฺตํ สุลทฺธลาโภ วต มาณวสฺส โย ปพฺพชิ กามราคํ ปหาย ฯ

๑๑๖๐ตปสา ปชหนฺติ ปาปกมฺมํ ตปสา นฺหาปิตกุชฺฌการภาวํ ตปสา อภิภุยฺย คงฺคมาล นาเมนาลปสิชฺช พฺรหฺมทตฺตํ ฯ

๑๑๖๑สนฺทิฏฺฐิกเมว อมฺม ปสฺสถ ขนฺติโสรจฺจสฺส โย วิปาโก โส สพฺพชนสฺส วนฺทิโต อหุ ตํ วนฺทาม สราชิกา สมจฺจา ฯ

๑๑๖๒มา กิญฺจิ อวจุตฺถ คงฺคมาลํ มุนินํ โมนปเถสุ สิกฺขมานํ เอโส หิ อตริ อณฺณวํ ยํ ตริตฺวา วิจรนฺติ วีตโสกาติ ฯ คงฺคมาลชาตกํ ปญฺจมํ ฯ ---------