๙. อัฏฐานชาดก

๑๑๘๘คงฺคา กุมุทินี สนฺตา สงฺขวณฺณา จ โกกิลา ชมฺพุ ตาลผลํ ทชฺชา อถ นูน ตทา สิยา ฯ

๑๑๘๙ยทา กจฺฉปโลมานํ ปาวาโร ติวิโธ สิยา เหมนฺติกํ ปาปุรณํ อถ นูน ตทา สิยา ฯ

๑๑๙๐ยทา มกสปาทานํ อฏฺฏาโล สุกโต สิยา ทโฬฺห จ อวิกมฺปี จ อถ นูน ตทา สิยา ฯ

๑๑๙๑ยทา สสวิสาณานํ นิสฺเสณิ สุกตา สิยา สคฺคสฺสาโรหณตฺถาย อถ นูน ตทา สิยา ฯ

๑๑๙๒ยทา นิสฺเสนิมารุยฺห จนฺทํ ขาเทยฺยุ มูสิกา ราหุญฺจ ปริพาเหยฺยุํ อถ นูน ตทา สิยา ฯ

๑๑๙๓ยทา สุราฆฏํ ปิตฺวา มกฺขิกา คณจารินี องฺคาเร วาสํ กปฺเปยฺยุํ อถ นูน ตทา สิยา ฯ

๑๑๙๔ยทา พิมฺโพฏฺฐสมฺปนฺโน คทฺรโภ สุมุโข สิยา กุสโล นจฺจคีตสฺส อถ นูน ตทา สิยา ฯ

๑๑๙๕ยทา กากา อุลูกา จ มนฺตเยยฺยุํ รโหคตา อญฺญมญฺญํ ปิหเยยฺยุํ อถ นูน ตทา สิยา ฯ

๑๑๙๖ยทา มูลาสปตฺตานํ ฉตฺตํ ถิรตรํ สิยา วสฺสสฺส ปฏิฆาตาย อถ นูน ตทา สิยา ฯ

๑๑๙๗ยทา กุลุโก สกุโณ ปพฺพตํ คนฺธมาทนํ ตุณฺเฑนาทาย คจฺเฉยฺย อถ นูน ตทา สิยา ฯ

๑๑๙๘ยทา สามุทฺทิกํ นาวํ สยนฺตํ สวฏากรํ เจโต อาทาย คจฺเฉยฺย อถ นูน ตทา สิยาติ ฯ อฏฺฐานชาตกํ นวมํ ฯ ---------