๑. จตุทวารชาดก

๑๓๑๙จตุทฺวารมิทํ นครํ อายสํ ทฬฺหโตรณํ โอรุทฺธปฏิรุทฺโธสฺมิ กึ ปาปํ ปกตํ มยา ฯ

๑๓๒๐สพฺเพ อปิหิตา ทฺวารา โอรุทฺโธสฺมิ ยถา ทิโช กิมาธิกรณํ ยกฺข จกฺกาภินิหโต อหํ ฯ

๑๓๒๑ลทฺธา สตสหสฺสานิ อติเรกานิ วีสติ อนุกมฺปกานํ ญาตีนํ วจนํ สมฺมนากริ ฯ

๑๓๒๒ลงฺฆึ สมุทฺทํ ปกฺขนฺทิ สาครํ อปฺปสิทฺธิยํ จตุพฺภิ อฏฺฐชฺฌคมา อฏฺฐาภิปิ จ โสฬส ฯ

๑๓๒๓โสฬสาภิ จ พตฺตึส อตฺริจฺฉํ จกฺกมาสโท อิจฺฉาหตสฺส โปสสฺส จกฺกํ ภมติ มตฺถเก ฯ

๑๓๒๔อุปริ วิสาลํ ทุปฺปูรํ อิจฺฉาวิสตคามินํ เย จ ตํ อนุคิชฺฌนฺติ เต โหนฺติ จกฺกธาริโน ฯ

๑๓๒๕พหุภณฺฑํ อวหาย มคฺคํ อปฺปฏิเวกฺขิย เยสํ เจตํ อสงฺขาตํ เต โหนฺติ จกฺกธาริโน ฯ

๑๓๒๖กมฺมํ สเมกฺเข วิปุลญฺจ โภคํ อิจฺฉํ น เสเวยฺย อนตฺถสญฺหิตํ กเรยฺย วากฺยํ อนุกมฺปกานํ ตํ ตาทิสํ นาติวเตยฺย จกฺกํ ฯ

๑๓๒๗กีวจิรนฺนุ เม ยกฺข จกฺกํ สิรสิ ฐสฺสติ กตี วสฺสสหสฺสานิ ตมฺเม อกฺขาหิ ปุจฺฉิโต ฯ

๑๓๒๘อติสโร อจฺจสโร มิตฺตวินฺท สุโณหิ เม จกฺกนฺเต สิรสฺมิมาวิทฺธํ น ตํ ชีวํ ปโมกฺขสีติ ฯ จตุทฺวารชาตกํ ปฐมํ ฯ ---------