๙. สุปปารกชาดก

ข้อ ๑๕๘๘–๑๖๐๐พระสุตตันตปิฎก เล่ม ๑๙ ขุททกนิกาย ชาดก ภาค ๑13 items2 editions

พระไตรปิฎกภาษาไทย ฉบับหลวง · Public domain (term expired) — operator determination

Front matter of the printed edition

๙ สุปฺปารกชาตกํ

อุมฺมุชฺชนฺติ นิมุชฺชนฺติ มนุสฺสา ขุรนาสิกา สุปฺปารกนฺตํ ปุจฺฉาม สมุทฺโท กตโม อยํ ฯ

ภรุกจฺฉา ปยาตานํ วาณิชานํ ธเนสินํ นาวาย วิปฺปนฏฺฐาย ขุรมาลีติ วุจฺจติ ฯ

ยถา อคฺคิ สุริโย จ สมุทฺโท ปฏิทิสฺสติ สุปฺปารกนฺตํ ปุจฺฉาม สมุทฺโท กตโม อยํ ฯ

ภรุกจฺฉา ปยาตานํ วาณิชานํ ธเนสินํ นาวาย วิปฺปนฏฺฐาย อคฺคิมาลีติ วุจฺจติ ฯ

ยถา ทธิ จ ขีรญฺจ สมุทฺโท ปฏิทิสฺสติ สุปฺปารกนฺตํ ปุจฺฉาม สมุทฺโท กตโม อยํ ฯ

ภรุกจฺฉา ปยาตานํ วาณิชานํ ธเนสินํ นาวาย วิปฺปนฏฺฐาย ทธิมาลีติ วุจฺจติ ฯ

ยถา กุโส จ สสฺโส จ สมุทฺโท ปฏิทิสฺสติ สุปฺปารกนฺตํ ปุจฺฉาม สมุทฺโท กตโม อยํ ฯ

ภรุกจฺฉา ปยาตานํ วาณิชานํ ธเนสินํ นาวาย วิปฺปนฏฺฐาย กุสมาลีติ วุจฺจติ ฯ

ยถา นโฬ จ เวฬุ จ สมุทฺโท ปฏิทิสฺสติ สุปฺปารกนฺตํ ปุจฺฉาม สมุทฺโท กตโม อยํ ฯ

ภรุกจฺฉา ปยาตานํ วาณิชานํ ธเนสินํ นาวาย วิปฺปนฏฺฐาย นฬมาลีติ วุจฺจติ ฯ

มหพฺภโย ภึสนโก สทฺโท สุยฺยติ มานุโส ยถา โสพฺโภ ปปาโตว สมุทฺโท ปฏิทิสฺสติ สุปฺปารกนฺตํ ปุจฺฉาม สมุทฺโท กตโม อยํ ฯ

ภรุกจฺฉา ปยาตานํ วาณิชานํ ธเนสินํ นาวาย วิปฺปนฏฺฐาย พลวามุขีติ วุจฺจติ ฯ

ยโต สรามิ อตฺตานํ ยโต ปตฺโตสฺมิ วิญฺญุตํ นาภิชานามิ สญฺจิจฺจ เอกปาณมฺปิ หึสิตํ เอเตน สจฺจวชฺเชน โสตฺถึ นาวา นิวตฺตตูติ ฯ สุปฺปารกชาตกํ นวมํ ฯ --------- ตสฺสุทฺทานํ สิริ มาตุสุโปสกนาควโร ปุน ชุณฺหก ธมฺมมุทยวโร อถ ปานีย ยุธญฺชยโก จ ทสรถ สํวร ปารคเตน นว ฯ เอกาทสนิปาตํ นิฏฺฐิตํ ฯ ---------