๘. เมณฑกปัญหาชาดก

๑๖๘๖เยสํ น กทาจิ ภูตปุพฺพํ สขิ สตฺตปทมฺปิ อิมสฺมึ โลเก ชาตา อมิตฺตา เทฺว สหายา ปฏิสนฺถาย จรนฺติ กิสฺส เหตุ ฯ

๑๖๘๗ยทิ เม อชฺช ปาตราสกาเล ปญฺหํ น สกฺกุณาถ วตฺตุเมตํ รฏฺฐา ปพฺพาชยิสฺสามิ โว สพฺเพ น หิ มมตฺโถ ทุปฺปญฺญชาติเกหิ ฯ

๑๖๘๘มหาชนสมาคมมฺหิ โฆเร ชนโกลาหลสงฺคมมฺหิ ชาเต วิกฺขิตฺตมนา อเนกจิตฺตา ปญฺหํ น สกฺกุโณม วตฺตุเมตํ ฯ

๑๖๘๙เอกคฺคจิตฺตาว เอกเมกา รหสิ คตา อตฺถานิ จินฺตยิตฺวา ปวิเวเก สมฺมสิตฺวาน ธีรา อถ วกฺขนฺติ ชนินฺท เอตมตฺถํ ฯ

๑๖๙๐อุคฺคปุตฺตราชปุตฺติยานํ อุรพฺภมํสํ ปิยํ มนาปํ น เต สุนขสฺส อเทนฺติ มํสํ อถ เมณฺฑสฺส สุเณน สขฺยมสฺส ฯ

๑๖๙๑จมฺมํ วิหนนฺติ เอฬกสฺส อสฺสปิฏฺฐตฺถรณํ สุขสฺส เหตุ น จ เต สุนขสฺส อตฺถรนฺติ อถ เมณฺฑสฺส สุเณน สขฺยมสฺส ฯ

๑๖๙๒อาเวลฺลิตสิงฺคิโก หิ เมณฺโฑ น จ สุนขสฺส วิสาณกานิ อตฺถิ ติณภกฺโข มํสโภชโน จ อถ เมณฺฑสฺส สุเณน สขฺยมสฺส ฯ

๑๖๙๓ติณมาสิ ปลาสมาสิ เมณฺโฑ น จ สุโณ ติณมาสิ โน ปลาสํ คเณฺหยฺย สุนโข สสํ พิฬารํ อถ เมณฺฑสฺส สุเณน สขฺยมสฺส ฯ

๑๖๙๔อฏฺฐฑฺฒปาโท จตุปฺปทสฺส เมณฺโฑ อฏฺฐนโข อทิสฺสมาโน ฉาทิยํ อาหรติ อยํ อิมสฺส มํสํ อาหรติ อยํ อมุสฺส ฯ

๑๖๙๕ปาสาทวรคโต วิเทหเสฏฺโฐ วีติหารํ อญฺโญญฺญโภชนานํ อทฺทส กิร สกฺขิตํ ชนินฺโท พุภุกฺกสฺส ปุณฺณมุขสฺส เจตํ ฯ

๑๖๙๖ลาภา วต เม อนปฺปรูปา ยสฺส เม อีทิสา ปณฺฑิตา กุลมฺหิ ปญฺหสฺส คมฺภีรคตํ นิปุณมตฺถํ ปฏิวิชฺฌนฺติ สุภาสิเตน ธีรา ฯ

๑๖๙๗อสฺสตรีรถญฺจ เอกเมกํ ผีตํ คามวรญฺจ เอกเมกํ สพฺเพสํ โว ทมฺมิ ปณฺฑิตานํ ปรมปฺปตีตมโน สุภาสิเตนาติ ฯ เมณฺฑกปญฺหาชาตกํ อฏฺฐมํ ฯ ---------