๑๓. ภิกขาปรัมปรชาดก

๒๐๒๔สุขุมาลรูปํ ทิสฺวา รฏฺฐา วิวนมาคตํ กูฏาคารวรูเปตํ มหาสยนมุโปจิตํ ตสฺส เต เปมเกนาหํ อทาสึ วฑฺฒโมทนํ สาลีนํ วิจิตฺตํ ภตฺตํ สุจิมํสูปเสจนํ ตํ ตฺวํ ภตฺตํ ปฏิคฺคยฺห พฺราหฺมณสฺส อทาปยิ อตฺตานํ อนสิตฺวาน โกยํ ธมฺโม นมตฺถุ เต ฯ

๒๐๒๕อาจริโย พฺราหฺมโณ มยฺหํ กิจฺจากิจฺเจสุ วฺยาวโฏ ครุ จ อามนฺตนิโย จ ทาตุมรหามิ โภชนํ ฯ

๒๐๒๖พฺราหฺมณํทานิ ปุจฺฉามิ โคตมํ ราชปูชิตํ ราชา เต ภตฺตํ ปาทาสิ สุจิมํสูปเสจนํ ตํ ตฺวํ ภตฺตํ ปฏิคฺคยฺห อิสิสฺส โภชนํ อทา อเขตฺตญฺญูสิ ทานสฺส โกยํ ธมฺโม นมตฺถุ เต ฯ

๒๐๒๗ภรามิ ปุตฺตทาเร จ ฆเรสุ คธิโต อหํ ภุญฺช มานุสเก กาเม อนุสาสามิ ราชิโน อารญฺญิกสฺส อิสิโน จิรรตฺตํ ตปสฺสิโน วุฑฺฒสฺส ภาวิตตฺตสฺส ทาตุมรหามิ โภชนํ ฯ

๒๐๒๘อิสิญฺจทานิ ปุจฺฉามิ กีสํ ธมนิสนฺถตํ ปรูฬฺหกจฺฉนขโลมํ ปงฺกทนฺตํ รชสฺสิรํ เอโก อรญฺเญ วิหรสิ นาวกงฺขสิ ชีวิตํ ภิกฺขุ เกน ตยา เสยฺโย ยสฺส ตฺวํ โภชนํ อทา ฯ

๒๐๒๙ขณมาลุกลมฺพานิ พิลาลิตกฺกลานิ จ ธุนํ สามากนิวารํ สํหาริยํ ปหาริยํ สากํ ภิสํ มธุํ มํสํ พทรามลกานิ จ ตานิ อาหตฺว ภุญฺชามิ อตฺถิ เม โส ปริคฺคโห ปจนฺโต อปจนฺตสฺส อมมสฺส สกิญฺจโน อนาทานสฺส สาทาโน ทาตุมรหามิ โภชนํ ฯ

๒๐๓๐ภิกฺขุญฺจทานิ ปุจฺฉามิ ตุณฺหิมาสีน สุพฺพตํ อิติ เต ภตฺตํ ปาทาสิ สุจิมํสูปเสจนํ ตํ ตฺวํ ภตฺตํ ปฏิคฺคยฺห ตุณฺหี ภุญฺชสิ เอกโก นาญฺญํ กญฺจิ นิมนฺเตสิ โกยํ ธมฺโม นมตฺถุ เต ฯ

๒๐๓๑น ปจามิ น ปาเจมิ น ฉินฺทามิ น เฉทเย ตํ มํ อกิญฺจนํ ญตฺวา สพฺพปาเปหิ อารตํ วาเมน ภิกฺขมาทาย ทกฺขิเณน กมณฺฑลุํ อิสิ เม ภตฺตํ ปาทาสิ สุจิมํสูปเสจนํ ฯ เอเต หิ ทาตุมรหนฺติ สมฺมา สปริคฺคหา ปจฺจนีกมหํ มญฺเญ โย ทาตารํ นิมนฺตเย ฯ

๒๐๓๒อตฺถาย วต เม อชฺช อิธาคจฺฉิ รเถสโภ โยหํ อชฺช ปชานามิ ยตฺถ ทินฺนํ มหปฺผลํ ฯ รฏฺเฐสุ คิทฺธา ราชาโน กิจฺจากิจฺเจสุ พฺราหฺมณา อิสี มูลผเล คิทฺธา วิปฺปมุตฺตา จ ภิกฺขโวติ ฯ ภิกฺขาปรมฺปรชาตกํ เตรสมํ ฯ --------- ตสฺสุทฺทานํ สุว กินฺนรมุกฺก ขราชินโส ภิสชาต มเหสิ กโปตวโร อถ โมร สตจฺฉก วาณิชโก อถ ราช สพฺราหฺมณ ภิกฺขปรํ ฯ ปกิณฺณกนิปาตํ นิฏฺฐิตํ ฯ ---------