๘. อาทิตตชาดก

๑๑๘๐อาทิตฺตสฺมึ อคารสฺมึ ยํ นีหรติ ภาชนํ ตํ ตสฺส โหติ อตฺถาย โน จ ยํ ตตฺถ ฑยฺหติ ฯ

๑๑๘๑เอวมาทิปิโต โลโก ชราย มรเณน จ นีหเรเถว ทาเนน ทินฺนํ โหติ สุนีภตํ ฯ

๑๑๘๒โย ธมฺมลทฺธสฺส ททาติ ทานํ อุฏฺฐานวิริยาธิคตสฺส ชนฺตุ อติกฺกมฺม โส เวตรณึ ยมสฺส ทิพฺพานิ ฐานานิ อุเปติ มจฺโจ ฯ

๑๑๘๓ทานญฺจ ยุทฺธญฺจ สมานมาหุ อปฺปาปิ สนฺตา พหุเก ชินนฺติ อปฺปมฺปิ เจ สทฺทหาโน ททาติ เตเนว โส โหติ สุขี ปรตฺถ ฯ

๑๑๘๔วิเจยฺย ทานํ สุคตปฺปสตฺถํ เย ทกฺขิเณยฺยา อิธ ชีวโลเก เอเตสุ ทินฺนานิ มหปฺผลานิ พีชานิ วุตฺตานิ ยถา สุเขตฺเต ฯ

๑๑๘๕โย ปาณภูตานิ อเหฐยํ จรํ ปรูปวาทา น กโรติ ปาปํ ภีรุํ ปสํสนฺติ น ตตฺถ สูรํ ภยา หิ สนฺโต น กโรนฺติ ปาปํ ฯ

๑๑๘๖หีเนน พฺรหฺมจริเยน ขตฺติเย อุปปชฺชติ มชฺฌิเมน จ เทวตฺตํ อุตฺตเมน วิสุชฺฌติ ฯ

๑๑๘๗อทฺธา หิ ทานํ พหุธา ปสตฺถํ ทานา จ โข ธมฺมปทํว เสยฺโย ปุพฺเพว หิ ปุพฺพตเรว สนฺโต นิพฺพานเมวชฺฌคมุํ สปญฺญาติ ฯ อาทิตฺตชาตกํ อฏฺฐมํ ฯ ---------