๙. กูฏวินิจฉยกเปตวัตถุ

๑๑๙|๑๑๙.๔๘๒| ๙ มาลี กิรีฏี กายูรี คตฺตา เต จนฺทนุสฺสทา ปสนฺนมุขวณฺโณสิ สุริยวณฺโณว โสภสิ ฯ |๑๑๙.๔๘๓| อมานุสา ปริสชฺชา เย เต เม ปริวาริกา ทส กญฺญาสหสฺสานิ ยา เตมา ปริจาริกา ฯ |๑๑๙.๔๘๔| ตา กมฺพุกายูรธรา กญฺจนเจลภูสิตา มหานุภาโวสิ ตุวํ โลมหํสนรูปวา ฯ |๑๑๙.๔๘๕| ปิฏฺฐิมํสานิ อตฺตโน สามํ อุกฺกจฺจ ขาทสิ กินฺนุ กาเยน วาจาย มนสา ทุกฺกฏํ กตํ กิสฺส กมฺมวิปาเกน ปิฏฺฐิมํสานิ อตฺตโน สามํ อุกฺกจฺจ ขาทสิ ฯ |๑๑๙.๔๘๖| อตฺตโนหํ อนตฺถาย ชีวโลเก อจริสฺสํ เปสุญฺญมุสาวาเทน นิกติวญฺจนาย จ ฯ |๑๑๙.๔๘๗| ตตฺถาหํ ปริสํ คนฺตฺวา สจฺจกาเล อุปฏฺฐิเต อตฺถํ ธมฺมํ นิรกตฺวา อธมฺมมนุวตฺติสฺสํ ฯ |๑๑๙.๔๘๘| เอวํ โส ขาทตตฺตานํ โย โหติ ปิฏฺฐิมํสิโก ยถาหํ อชฺช ขาทามิ ปิฏฺฐิมํสานิ อตฺตโน ฯ |๑๑๙.๔๘๙| ตยิทํ ตยา นารท สามํ ทิฏฺฐํ อนุกมฺปกา เย กุสลา วเทยฺยุํ มา เปสุณํ มา จ มุสา ภณิ มา โขสิ ปิฏฺฐิมํสิโก ตุวนฺติ ฯ กูฏวินิจฺฉยกเปตวตฺถุ นวมํ ฯ