๑๑. ติงสมัตตาเถรีคาถา

๔๔๙|๔๔๙.๑๑๗| ๑๑ มุสลานิ คเหตฺวาน ธญฺญํ โกฏฺเฏนฺติ มาณวา ปุตฺตทารานิ โปเสนฺตา ธนํ วินฺทนฺติ มาณวา ฯ |๔๔๙.๑๑๘| กโรถ พุทฺธสาสนํ ยํ กตฺวา นานุตปฺปติ ขิปฺปํ ปาทานิ โธวิตฺวา เอกมนฺเต นิสีทถ เจโตสมถมนุยุตฺตา กโรถ พุทฺธสาสนํ ฯ |๔๔๙.๑๑๙| ตสฺสา ตา วจนํ สุตฺวา ปฏาจาราย สาสนํ ปาเท ปกฺขาลยิตฺวาน เอกมนฺตํ อุปาวิสุํ เจโตสมถมนุยุตฺตา อกํสุ พุทฺธสาสนํ ฯ |๔๔๙.๑๒๐| รตฺติยา ปุริเม ยาเม ปุพฺพชาติมนุสฺสรุํ รตฺติยา มชฺฌิเม ยาเม ทิพฺพจกฺขุํ วิโสธยุํ รตฺติยา ปจฺฉิเม ยาเม ตโมกฺขนฺธํ ปทาลยุํ ฯ |๔๔๙.๑๒๑| อุฏฺฐาย ปาเท วนฺทึสุ กตา เต อนุสาสนี อินฺทํว เทวา ติทสา สงฺคาเม อปราชิตํ ปุรกฺขิตฺวา วิหริสฺสาม เตวิชฺชมฺหา อนาสวา ฯ อิตฺถํ สุทํ ตึสมตฺตา เถรี ภิกฺขุนิโย ปฏาจาราย สนฺติเก อญฺญํ พฺยากรึสุ ฯ