๑. อัมพปาลีเถรีคาถา

๔๖๗|๔๖๗.๒๕๑| ๑ กาฬกา ภมรวณฺณสทิสา เวลฺลิตคฺคา มม มุทฺธชา อหุํ เต ชราย สาณวากสทิสา สจฺจวาทิวจนํ อนญฺญถา ฯ |๔๖๗.๒๕๒| วาสิโตว สุรภิกรณฺฑโก ปุปฺผปูรํ มม อุตฺตมงฺคภูโต ตํ ชรายถ สโลมคนฺธิกํ สจฺจวาทิวจนํ อนญฺญถา ฯ |๔๖๗.๒๕๓| กานนํว สหิตํ สุโรปิตํ โกจฺฉสูจิวิจิตฺตคฺคโสภิตํ ตํ ชราย วิรฬํ ตหึ ตหึ สจฺจวาทิวจนํ อนญฺญถา ฯ |๔๖๗.๒๕๔| สณฺหคนฺธกสุวณฺณมณฺฑิตํ โสภเต สุ เวณีหิ อลงฺกตํ ตํ ชราย ขลิตํ สิรํ กตํ สจฺจวาทิวจนํ อนญฺญถา ฯ |๔๖๗.๒๕๕| จิตฺตการสุกตาว เลขิตา โสภเต สุ ภมุกา ปุเร มม ตา ชราย วลีหิ ปลมฺพิตา สจฺจวาทิวจนํ อนญฺญถา ฯ |๔๖๗.๒๕๖| ภสฺสรา สุรุจิรา ยถา มณิ เนตฺตาเหสุํ อภินีลมายตา เต ชรายภิหตา น โสภเต สจฺจวาทิวจนํ อนญฺญถา ฯ |๔๖๗.๒๕๗| สณฺหตุงฺคสทิสี จ นาสิกา โสภเต สุ อภิโยพฺพนํ ปติ สา ชราย อุปกูลิตา วิย สจฺจวาทิวจนํ อนญฺญถา ฯ |๔๖๗.๒๕๘| กงฺกณํว สุกตํ สุนิฏฺฐิตํ โสภเต สุ มม กณฺณปาฬิโย ปุเร ตา ชราย วลีหิ ปลมฺพิตา สจฺจวาทิวจนํ อนญฺญถา ฯ |๔๖๗.๒๕๙| ปตฺตลิมกุลวณฺณสทิสา โสภเต สุ ทนฺตา ปุเร มม เต ชราย ขณฺฑา ยวปีตกา สจฺจวาทิวจนํ อนญฺญถา ฯ |๔๖๗.๒๖๐| กานนสฺมึ วนสณฺฑจาริณี โกกิลาว มธุรํ นิกูชิตํ ตํ ชราย ขลิตํ ตหึ ตหึ สจฺจวาทิวจนํ อนญฺญถา ฯ |๔๖๗.๒๖๑| สณฺฐกมฺมุทีว สุปฺปมชฺชิตา โสภเต สุ คีวา ปุเร มม สา ชราย ภคฺคา วินามิตา สจฺจวาทิวจนํ อนญฺญถา ฯ |๔๖๗.๒๖๒| วฏฺฏปลิฆสทิโสปมา อุโภ โสภเต สุ พาหา ปุเร มม ตา ชราย ยถา ปาฏลิปฺปลิตา สจฺจวาทิวจนํ อนญฺญถา ฯ |๔๖๗.๒๖๓| สณฺหมุทฺทิกาสุวณฺณมณฺฑิตา โสภเต สุ หตฺถา ปุเร มม เต ชราย ยถา มูลมูลิกา สจฺจวาทิวจนํ อนญฺญถา ฯ |๔๖๗.๒๖๔| ปีนวฏฺฏสหิตุคฺคตา อุโภปิ โสภเต สุ ถนกา ปุเร มม เถรีติ ว ลมฺพนฺเตโนทกา สจฺจวาทิวจนํ อนญฺญถา ฯ |๔๖๗.๒๖๕| กญฺจนสฺส ผลกํว สุมฏฺฐํ โสภเต สุ กาโย ปุเร มม โส วลีหิ สุขุมาหิ โอตโต สจฺจวาทิวจนํ อนญฺญถา ฯ |๔๖๗.๒๖๖| นาคโภคสทิโสปมา อุโภ โสภเต สุ อูรู ปุเร มม ตา ชราย ยถา เวฬุนาฬิโย สจฺจวาทิวจนํ อนญฺญถา ฯ |๔๖๗.๒๖๗| สณฺหนูปุรสุวณฺณมณฺฑิตา โสภเต สุ ชงฺฆา ปุเร มม ตา ชราย ติลทณฺฑการิว สจฺจวาทิวจนํ อนญฺญถา ฯ |๔๖๗.๒๖๘| ตูลปุณฺณสทิโสปมา อุโภ โสภเต สุ ปาทา ปุเร มม เต ชราย ผุฏิกา วลีมตา สจฺจวาทิวจนํ อนญฺญถา ฯ |๔๖๗.๒๖๙| เอทิโส อหุ อยํ สมุสฺสโย ชชฺชโร พหุทุกฺขานมาลโย โสปเลปปติโต ชราฆโร สจฺจวาทิวจนํ อนญฺญาถ ฯ อมฺพปาลี ฯ